सबस्त इन्टरटेनमेन्ट,काठमान्डौ – गलबन्दी प्रोडक्सनको प्रस्तुतिमा निर्माण भएको चलचित्र ‘वसन्त’ को नयाँ गीत ‘बिना स्वादैको’ सार्वजनिक भएको छ । गीतको भिडियोमा चलचित्रका मुख्य कलाकारद्वय प्रभात पाल ठकुरी, श्री शिभान्सी, गायक देवेन्द्र बब्लु, मुख्य सहायक निर्देशक सुनिल विक तथा कलाकार विशाल पहारीलाई फिचर्ड गरिएको छ ।
गीतमा गायक देवेन्द्र बब्लुको स्वर तथा परिकल्पना, संगीत गायक तथा निर्देशक प्रकाश सपुत र देवेन्द्र बब्लु अनि संगीत संयोजन योगेश काजी शाहको छ ।
हरर रोमान्टिक थिममा तयार पारिएको गीतको भिडियोले दर्शकमाझ जिज्ञाशा देखेको छ । एक जोडीको अन्तर जातिय प्रेम पश्चात परिवारले उनीहरुको मोहनी फुकाउन गर्ने विभिन्न घटनालाई देखाइएको छ ।
चलचित्रमा कलाकारहरु प्रकाश शपुत, स्वस्तिमा खड्का, प्रभात पाल ठकुरी, श्री शिभान्सी, उर्मिला लाम्गादे र खड्क बहादुर पुन (खबपु) , अनुप बराल, कमलमणी नेपाल, प्रकाश घिमिरे लगायतकाहरुको अभिनय रहेको छ ।
सामाजिक कथाबस्तुमा बनेको चलचित्रमा कथा, पटकथा र संगीत निर्देशक प्रकाश सपुतले नै तयार गरेका हुन् । विपन्न विश्वकर्मा समुदायको छोराको लेखक बन्ने सपना र लक्ष्य हासिल गर्न उसले गर्ने संघर्षको कथा चलचित्रले भन्ने छ ।
चलचित्रको निर्मातामा मोहन विश्वकर्मा र बिन्दु बोहोरा तथा कार्यकारी निर्मातामा अनुरोध भट्टराई, नाना थकाली र विरेन्द्र नारायण श्रेष्ठ छन् । चलचित्रलाई सुसन प्रजापतिले छायांकन गरेका हुन् । काठमाडौं उपत्यकामा डिसिएन र मोफसलमा एफडी कम्पनिले चलचित्रलाई वितरण गर्नेछन् ।
गायक तथा अभिनेता प्रकाश सपुतको निर्देशनमा निर्माण भएको चलचित्र आगामी चैत २२ गते चैते दशैँको अवसर पारेर प्रदर्शनमा आउदै छ ।
प्रतिक्रिया