सबस्त इन्टरटेनमेन्ट,काठमान्डौ – चलचित्र ‘रणवीर’बाट फिल्मी करियर सुरु गरेकी अभिनेत्री सुपुष्पा भट्टले पछिल्लो चलचित्र ‘फेरि रेशम फिलिली’ सम्म आइपुग्दा प्रायः चञ्चले चरित्र निभाइन् । यी अभिनेत्री यही चैत २९ गतेबाट रिलिज हुने चलचित्र ‘पिताम्बर’मा केही फरक चरित्रमा देखिँदैछिन् ।
सुपुष्पा ‘पिताम्बर’मा ‘बिहानी’ नामको पात्रमा देखिँदैछिन् । ‘बिहानी विधवा छे र इनोनसेन्ट छे । बिहानी कसरी विधवा हुन्छे भन्ने थाहा पाउन चलचित्र नै हेर्नुपर्छ’, सुपुष्पा भन्छिन्,‘मैले गर्न खोजेको क्यारेक्टर पिताम्बरमा छ । यो क्यारेक्टरमा फेज र ग्राफ छ । कहाँदेखि कहाँसम्म के भइरहेको छ भन्ने बिहानी मार्फत थाहा पाइन्छ ।’
सुपुष्पाको डेब्यू चलचित्र ‘रणवीर’ एक्सन बेसमा नै थियो । ‘रणवीर र पिताम्बरको जनरा एउटै भए पनि कथा फरक छ । मेरो क्यारेक्टरमा बिल्कुलै फरकपन पाउनुहुनेछ’, उनी भन्छिन् ।
चलचित्रका सह–निर्माता पुरुषोत्तम प्रधानले बोलाएर स्क्रिप्ट सुनाएपछि उनी चलचित्रमा काम गर्न सहमत भएकी रहिछन् । ‘यो चलचित्रमा काम गर्छु भनेर पहिले नै योजना थिएन । स्क्रिप्ट सुनेपछि नाइँ भन्न सकिनँ । वान लाइन र मेरो क्यारेक्टरले तान्यो’, सुपुष्पा खुल्छिन् ।
सुपुष्पाले ‘पिताम्बर’मा अभिनय गरेपछि विधवाको जीवनलाई केही बुझेकी रहिछन् । ‘नेपाली समाजमा बसिसकेपछि विधवाको जीवन बाँच्न गाह्रो हुँदो रहेछ । आफूलाई माया गर्ने मान्छे नै नहुँदा गाह्रो पक्कै हुन्छ । यो चलचित्रमा काम गरेपछि मैले केही बुझें । अहिले त महिलाहरुले आफ्नो स्ट्याण्ड लिनुभएको छ । उहाँहरु माथि पनि आइरहनुभएको छ’, उनी भन्छिन् ।
उनी मल्टिस्टार चलचित्र ‘पिताम्बर’मा जोडिन पाउनु आफ्नो लागि भाग्यशाली ठान्छिन् । ‘आफ्नो पात्रमा गर्न सक्ने हो कि होइन भन्ने कुराले सुरुमा मलाई गाह्रो भएको थियो । तर मल्टिस्टार फिल्ममा मैले यतिको स्पेस पाएँ भनेर आफूलाई भाग्यशाली ठानेकी थिएँ । यति धेरै कलाकारमा म पनि एउटा छु है भन्नेमा गर्व छ’, उनी भन्छिन्, ‘तर काममा प्रेसर चाहिँ हुँदो रहेछ । सबैको कलाकार राम्रो अभिनय गर्ने हुनुहुन्छ । मेरो अभिनय चाहिँ कताबाट चिप्लिने हो कि भन्ने डर थियो । आफू तयारी अवस्थामा रहेपछि त्यो डर हराउँदो रहेछ ।’
सुपुष्पाको बुझाईमा राम्रो भिजन भएको मान्छेले चलचित्र बनाउन सजिलो हुन्छ । ‘महिला र पुरुष निर्देशक भन्दा पनि निर्देशक भनेको निर्देशक नै हो । राम्रो भिजन भएको मान्छेले चलचित्र बनाउन सजिलो हुन्छ । आफ्नो भिजन बुझेको र कस्तो चलचित्र बनाउने भन्ने थाहा पाएको निर्देशकसँग काम गर्न पाएँ । मलाई धेरै सजिलो भयो’, उनी भन्छिन् ।
सुपुष्पालाई एक्सन चलचित्रमा काम गर्न मन रहेछ । ‘एक्सन चलचित्रमा आफैले एक्सन गर्न मन छ । यो पहिलोदेखि कै इच्छा हो । त्यस्तो चलचित्रको अफर आयो भनेर स्क्रिप्ट र आफ्नो क्यारेक्टर हेरेर निर्णय लिन्छु’, सुपुष्पा भन्छिन् ।
प्रतिक्रिया