बसन्त र शान्तिश्रीले रेकर्ड गरे ‘झिँगेदाउ २’को गीत

सबस्त इन्टरटेनमेन्ट,काठमान्डौ – ज्ञानेन्द्र देउजाको निर्माण तथा निर्देशन रहने सिनेमा ‘झिँगेदाउ २’को गीत रेकर्डिङ्ग गरिएको छ । बुधबार पछिल्लो समयकी चर्चित गायिका शान्तिश्री परियार तथा गायक बसन्त थापाको स्वरमा ‘आजलाई नाई नभन’ गीत रेकर्ड गरिएको हो । गायक तथा थापाले ‘छ माया छपक्कै’ पछि दोस्रो पटक पाश्र्व गायनको नेपाली चलचित्रको गीतमा स्वर भरेका हुन् । यो गीतमा संगीतकार पोखरेलको नै शब्द, संगीत र एरेञ्ज रहेको छ । गायक थापा र संगीतकार अर्जुन पोखरेलले पहिलो पटक सहकार्य गरेका हुन् ।

गायिका परियार, निर्देशक देउजा र संगीतकार पोखरेलले यसअघि झिँगेदाउको गीत ‘आगो बिना बिँडी जल्दैन’मा सहकार्य गरेका थिए । यो गीत हिट भएकाले निर्देशक देउजाले लक्की चार्मको रुपमा ‘झिँगेदाउ २’मा समेत गायिका परियारसँग सहकार्य गरिएको बताउँछ । अबको १० दिनमा गीत लगायत चलचित्रको सम्पूर्ण प्रि-प्रोडक्सको काम सकिने दशैं तिहार लगत्तै छायांकमा निस्कने तयारी निर्माण टिमको छ ।

यो चलचित्रको कथा पहिलो भाग जहाँ सकिएको थियो । त्यँहीबाट सुरुहुने भएकाले ‘झिँगेदाउ २’ पूर्ण रुपमा सिक्वेल रहेको निर्देशक देउजाले जानकारी दिए । चलचित्रको मुख्य भूमिकामा केकी अधिकारी, आँचल शर्मा, मुकुन भुषाल, कुशल बिष्टसहित पहिलो भागका अधिकाँश कलाकार दोहोरिने छन् । यो बाहेक एक अभिनेता र एक अभिनेत्री नयाँ कलाकारको प्रवेश हुनेछ ।

कपनगढी चलचित्र प्रालिको व्यानरमा निर्माण हुने चलचित्रका निर्माता शुलभ प्रतिक देउजा र समीक्षा देउजा हुन् । ईश्वर घिमिरे प्रोडक्सन हेड रहेको चलचित्रमा बिष्णु कल्पितको छायांकन, अर्जुन पोखरेलको संगीत, रोशन श्रेष्ठको द्धन्द्व निर्देशन र मित्र डि गुरुङको सम्पादन रहनेछ ।