सबस्त इन्टरटेनमेन्ट,काठमान्डौ – नेपाली मौलिकता, परम्परा र संस्कृतिमा आधारित चलचित्र ‘रत्यौली’को निर्माण औपचारिक रूपमा घोषणा गरिएको छ । विवाह संस्कारको विशेष अङ्गका रूपमा महिलाहरुले मात्र गाउने परम्परागत लोकगीत ‘रत्यौली’बाट प्रेरित भई यो चलचित्रको नाम राखिएको हो । सोहि कारण यो चलचित्र सांस्कृतिक चेतनाले भरिएको हुन सक्ने बुझिएको छ ।
रन्जन रिजालको प्रस्तुतिमा निर्माण हुने यो चलचित्रबाट उनी चलचित्र निर्माणमा डेब्यु गर्न लागेका हुन् । २०६२/६३ सालदेखि म्युजिक भिडियो क्षेत्रमा मोडलका रूपमा सक्रिय रहेका रिजालले सयौं भिडियोमा अभिनय गर्दै सशक्त छवि बनाएका छन् ।
‘नाई नभन्नु ३’ र ‘समभर लभ’ जस्ता सफल चलचित्र निर्देशन गरेका मुस्कान ढकाल यो चलचित्रका निर्देशक हुन् । नेपाली युवा निर्देशकहरूमा सम्भावना बोकेका ढकालले यो पटक सांस्कृतिक र पारिवारिक कथामा आधारित चलचित्र निर्देशन गर्न लागेका छन् ।
नाइट एंगल इन्टरटेनमेन्टको ब्यानरमा निर्माण हुन लागेको चलचित्रलाई नोयन्द्र धिताल, विजय कुमार पाठक र मुस्कान ढकालको लगानीमा निर्माण गर्न लागिएको हो । चलचित्रको छायांकन आगामी तिहार लगत्तै सुरु हुनेछ । साउन १६ गते आज शुक्रवार निर्माण टिमले टाइटल सार्वजनिक गरेको हो । अहिले कलाकार छनोट र प्राविधिक तयारी अघि बढिरहेको निर्माण टिमले जनाएको छ ।
प्रस्तुतकर्ता रन्जन रिजाल भन्छन्, ‘नेपाली दर्शकहरूले नेपाली परिवेश, भाषा र मौलिक कथावस्तुमा बनेका चलचित्र बढी रुचाउँछन् । त्यसैले हामीले पनि दर्शकको चाहना अनुसार चलचित्रको विषयवस्तु र प्रस्तुति तयार गर्न थालेका हौं ।’
निर्देशक मुस्कान ढकालका अनुसार हाल चलचित्रको लोकेशन र कलाकार फाइनल गर्ने काम सुरु भएको छ । चलचित्रले नेपाली संस्कृति र मनोरञ्जनलाई सन्तुलित ढंगले प्रस्तुत गर्ने लक्ष्य लिएको निर्देशक ढकाल बताउँछन् ।
प्रतिक्रिया