३६को आँकडा’को फस्टलुक पोस्टर, रेखाको हत्कडीमा पूजा, २ लिडिङ लेडीको टक्कर केमा ?

सबस्त इन्टरटेनमेन्ट,काठमान्डौ – अभिनेत्री रेखा थापाको होम प्रोडक्सनमा तयार हुन लागेको नयाँ चलचित्र ‘३६को आँकडा’ को फस्ट लुक पोस्टर सार्वजनिक भएको छ।

पोस्टरमा मुख्य भूमिकामा रहेका रेखा थापा र पूजा शर्मा फिचर छन्। प्रहरी अधिकारीको भूमिकामा प्रस्तुत भएकी रेखाले पूजालाई हत्कडी लगाएर नियन्त्रणमा लिएको देखिन्छ। पोस्टरमा रेखाको अनुहारमा संघर्षपछि प्राप्त विजयको अभिव्यक्ति देखिन्छ भने पक्राउ परेकी पूजाको अनुहारमा अझै टक्कर जारी रहेको भाव झल्किन्छ।

आज सार्वजनिक पोस्टरले नेपाली चलचित्रमा प्रायः नदेखिएको फरक दृश्य प्रस्तुत गरेको छ। दुई महिला पात्रबीचको द्वन्द्वलाई चलचित्रको केन्द्रमा राखिएको देखिन्छ, जुन सम्भवतः नेपाली चलचित्र इतिहासमा पहिलोपटक हो। यस आधारमा चलचित्रले विशेष खाले कथा प्रस्तुत गर्ने अनुमान गर्न सकिन्छ।

फ्लोरमा जानु अघिनै सार्वजनिक गरिएको यो फस्ट लुक पोस्टरले दर्शकको उत्सुकता बढाउने अपेक्षा छ । नेपाली चलचित्रमा फरकफरक छिमलमा ‘लिडिङ लेडी’को पहिचान बनाउँदै आफूलाई स्थापित गरेका यी दुई अभिनेत्रीको पर्दाको टक्कर दर्शकका लागि रोचक हुने देखिन्छ।

सबिर श्रेष्ठको निर्देशनमा बन्ने यो चलचित्र आगामी सोमबारबाट फ्लोरमा जानेछ। निर्माण पक्षले आज सार्वजनिक पोस्टरमा अन्य कलाकार र प्राविधिक टिमबारे जानकारी दिएको छैन। सुटिङपछि ती विवरण सार्वजनिक गर्ने तयारीमा रहेको बताइएको छ।

चलचित्रमा रेखासँग पछिल्लो समय अभिनयका लागि चर्चित महेश त्रिपाठीको जोडी बाँधिनेछ भने पूजासँग पुष्प खड्काको जोडी देखिनेछ।