सबस्त इन्टरटेनमेन्ट,काठमान्डौ – दशैँको अवसरमा रिलिज हुन लागेको बहुप्रतिक्षित चलचित्र ‘हरिबहादुरको जुत्ता’को टिजर सार्वजनिक भएको छ।
हाँसो, आँसु र करुणासहित सबै भावनालाई समेटेको टिजरले नेपाली दर्शकलाई टेलिभिजन सिरियलमा चर्चित बनेको हरिबहादुर पात्र सम्झाउँछ ।
सिरियलमा चोर र ठगको परिचय बनाएको हरिबहादुर, जसले अरुलाई मात्रै रुवाउँथ्यो, चलचित्रमा आइपुग्दा भने आफू पनि रोएको देख्न सकिन्छ। निर्देशक दीपेन्द्र के. खनालले यसपटक हरिबहादुरलाई केवल हास्यमै सीमित नराखी भावुक र कारुणिक पात्रका रूपमा पनि देखाउन खोजेको आभास टिजरले दिन्छ।
असोज १३ गतेबाट प्रदर्शनमा आउने चलचित्रमा हरिबहादुर (हरिवंश आचार्यको पात्र) केन्द्रमा रहेपनि अन्य चर्चित कलाकारहरूको अभिनय पनि देख्न सकिन्छ।
टिजरमा प्रियंका कार्की प्रहरीको भूमिकामा देखिएकी छिन भने स्वस्तिमा खड्का, प्रकाश सपुत, दिव्य देव, हरिहर शर्मा, राजाराम पौडेल, दिनेश काफ्ले, कमलमणी नेपाल लगायत कलाकारहरूको अभिनय पनि समावेश छ।
एसएम मोसन पिक्चर्सको ब्यानरमा निर्माण भएको चलचित्रलाई सरोज ओली र मोहितवंश आचार्यले निर्माण गरेका हुन् । चलचित्रका छायांकन कृष्ण बहादुर थापा, सम्पादन नकुल खड्का ले गरेका छन्। संगीतमा वसन्त सापकोटा, दीपक शर्मा र प्रकाश सपुत छन् भने स्वरमा आशिस अविरल, समीक्षा अधिकारी, मोहितवंश आचार्य, समिर खरेल र सज्जा चौलागाई रहेका छन् ।
दशैँमा दर्शकलाई हाँसो, रमाइलो र भावनात्मक यात्रा दिने वाचा गर्दै ‘हरिबहादुरको जुत्ता’रिलिज हुन लागेको छ।
प्रतिक्रिया