सबस्त इन्टरटेनमेन्ट,काठमान्डौ – गत सोमबार सार्वजनिक भएको चलचित्र ‘जेरी अन टप’को टिजरले उत्कृष्ट प्रतिक्रिया पाएको छ । रिलिजसँगै सामाजिक सञ्जालमा लोकप्रिय बनेको टिजरलाई बुढासुब्बा डिजिटलको च्यानलमा मात्रै हालसम्म १५ लाख बढि पटक हेरिएको छ ।
युट्यूवमा ‘जेरी अन टप टिजर नेपालमा सर्वाधिक चर्चा पाउने चलचित्र ट्रेलरको ट्रेण्डिङ सूचीमा शीर्ष स्थान कायम गर्न सफल भएको छ भने अन्य दर्जनबढि देशमा चलचित्रको टिजरले ‘मुभिज ट्रेन्डिङ चार्ड’तर्फ अग्र स्थान ओगटेको छ । विदेशमा यो चलचित्रको टिजरप्रति देखिएको क्रेजले अन्तर्राष्ट्रिय व्यापारमा सुखद संकेत गर्छ ।
युट्यूव, इन्स्टाग्राम र फेसबुक लगायतका सामाजिक सञ्जालमा सार्वजनिक दर्जनौँ टिजर रिभ्यू र रियाक्सन भिडियोमा यो फिल्मप्रति बहु-प्रतिक्षितका शब्दहरू व्यक्त छन् । सगरमाथा आरोहणको कथा जोडिएको चलचित्रमा समावेश दृश्यहरू, कलाकारको अभिनय कला, व्याकग्राउण्ड म्युजिक, भिएफएक्स लगायतको पाटोलाई दर्शकले उच्च प्रशंसा गरेका छन् ।
सरोज न्यौपानेको प्रस्तुति र सुयोग गुरुङको निर्देशनमा तयार चलचित्र आगामी असोज ३१ गतेबाट सार्वजनिक प्रदर्शनमा आउनेछ ।
चलचित्रमा युवापुस्ताका चर्चित अभिनेता अनमोल केसी, अभिनेत्रीद्वय आँचल शर्मा, जसीता गुरुङ, केदार घिमिरे ‘माग्नेबुढा’, भुवन केसी, उषा उप्रेती, सुरक्षा पन्त लगायतका कलाकार शीर्ष अभिनयमा छन् । अभिनेता अनमोलले दर्शक तथा शुभचिन्तकबाट प्राप्त प्रेममा खुशी साट्दै धन्यवाद ज्ञापन गरेका छन् ।
‘जेरी अन टप’को कथा हेमराज बिसीको हो । चलचित्रमा कालिप्रसाद बाँस्कोटा, जयन जे वाइबा, जोहन चाम्लिङ राई र व्रिजेश श्रेष्ठको संगीत छ । विस्वास तिम्सिनाको पटकथा रहँदा दुलिप रेग्मीको छायांकन छ ।
चलचित्रलाई नेपालभित्र रीच इन्टरटेन्मेन्ट र एफडी कम्पनिले वितरण अधिकार लिएका छन् । महंगो लागत र फ्रण्टलाइनर स्टारकास्ट समावेश चलचित्रलाई वर्षको प्रतिक्षित चलचित्र मानिएको छ ।
प्रतिक्रिया