सबस्त इन्टरटेनमेन्ट,काठमान्डौ – कातिक ७ गतेबाट प्रदर्शनमा आउन लागेको चलचित्र ‘मैझारो’को प्रचारप्रसार व्यापक रुपमा गर्न थालिएको छ। निर्माण टिमले आफ्नो चलचित्रको प्रचारप्रसारमा व्यापक बनाउन थालेको हो। यसैसिलसिलामा पुर्वका विभिन्न शहरमा सांगीतिक कार्यक्रमको आयोजना गरेको छ। यतिबेला पुर्वका अधिकांश इ–रिक्साका साथै अटो मैझारो मय भएको देखिन्छ। जताततै अटोमा मैझारोका फ्लेसहरु झुण्डिएका छ।
गायक तथा हास्य कलाकार समेत रहेका चलचित्रका निर्देशक तथा निर्माता विल्सन विक्रम राईले आफ्नो चलचित्रलाई दर्शकमाझ पुर्याउन कसिएर लागेका छन्। उनी आफ्नै सांगीतिक प्रस्तुतिमार्फत दर्शकलाई हँसाउदै सांगीतिक धमाका दिदैछन्। उनीसँग राई इज किङ गायक राजेश पायल राई,संगीतकार तथा गायक अनमोल गुरुङका साथै चलचित्रका मुख्य कलाकारहरुको बेजोड प्रस्तुति रहनेछ। हिजो बिहिबार धरानमा चलचित्रको प्रचारका रुपमा व्यापक कन्सर्टको आयोजना गरिएको थियो। जहाँ हजारौ धरानबासी दर्शकको उपस्थिति रहेको थियो।
आज आफ्नै गृह जिल्लामा यस चलचित्रका निर्देशक विल्सन विक्रम राईको टिमले सांगीतिक प्रस्तुति दिदै छ। असोज २५ गते बिर्तामोडको मुक्ती चोकमा कार्यक्रम हुनेछ। निर्माण पक्षले झापाको बिर्तामोड,दमक,मोरङको बेलबारी,सुनसरीको इटहरी,धरानमा सांगीतिक कार्यक्रमको आयोजना गरेको हो। सोहीक्रममा आज बिर्तामोडमा कार्यक्रम हुन लागेको निर्देशक राईले बताए।
‘चलचित्र मैझारोको व्यापक प्रचारमा लागेका छौँ,’उनले भने,‘दर्शकलाई मनोरञ्जनका साथै चलचित्र हलमा लाग्न लागेको जानकारी दिनका लागि यो कार्यक्रमको आयोजना गरेका हौँ। यो नौलो तरिका पनि हो।’
यसअघि यो चलचित्रको प्रचारसामाग्री पोस्टर,दुई वटा गीत र टिजरले दर्शकको मन जिति सकेको छ। तर निर्देशक यतिप्रसारमा नपुग्ने भन्दै उनी सांगितिक कार्यक्रममार्फत आफ्नो चलचित्रलाई दर्शकमाझ पुर्याउन होमिएका हुन्। उनको यो डेब्यु निर्देशन पनि हो। त्यसैले उनी प्रचारप्रसारमा कुनै कसुर नराख्ने बिचारमा छन्।
निर्देशक राईकै लगानी र लेखन रहेको यस चलचित्रले मौलिक प्रेम कथालाई बोल्ने छ। चलचित्रमा धिरज मगर,मिरुना मगर,दिया पुन,बुद्धि तामाङ, सुनिल थापा, पुस्कर गुरुङ, अभयराज बराल, माउत्से गुरुङ, कविता आले, रजनी गुरुङ, प्रेम सुब्बा, उदय सुब्बा, अनिल सुब्बा, भूपेन्द्र लिङदेन र विशाल लिम्बु लगायतका कलाकारको अभिनय रहेको छ।
‘तक्मे प्रोडक्सन’ को ब्यानरमा निर्माण भएकोचलचित्रका गीतमा अनमोल गुरुङ र तोरेम्पाहाङ राईले संगीत भरेका छन्। गायनमा राजेशपायल राई, झुमा लिम्बू ,मेलिना राई, अस्मिता अधिकारी लगायतको रहेको छ। सौरभ लामाले खिचेको यो चलचित्रलाई आरआर फिल्मस्ले वितरण गर्दैछ भने डिजिटल अधिकार ओएसआरले लिएको छ।
प्रतिक्रिया