पूजाको आइटम डान्स खिच्दै सकियो ‘कल्ली’को छायांकन

सबस्त इन्टरटेनमेन्ट,काठमान्डौ –फागुन १ गतेलाई प्रदर्शन मिति तय गरिएको चलचित्र ‘कल्ली’को छायांकन सकिएको छ । चोभारमा एउटा गीतको छायांकन सकेसँगै चलचित्रको सम्पूर्ण छायांकन सकिएको निर्माणपक्षले जानकारी दिएको छ ।

नायिका पूजा शर्माको आइटम डान्स २ दिन लगाएर खिच्दै चलचित्रको छायांकन ६० दिनमा प्याकअप भएको निर्माता किरण नेपालीले जानकारी दिए । चलचित्रको छायांकन जुम्लामा गरिएको हो ।

पूजाले ‘क्या राम्री’ बोलको गीतमा नृत्य गरेकी हुन् । आशिष अविरलको संगीतमा तयार भएको गीतलाई रामजी लामिछानेले कोरियोग्राफी गरेका छन् । आशिष अविरल र अस्मिता अधिकारीको स्वर रहेको यो गीतमा सुरेन्द्र रानाको शब्द छ । यो गीत आफूलाई सुन्ने वित्तिकै मन परेकाले काम गरेको नायिका शर्माले बताइन् । बिहेपश्चात पूजाले यही चलचित्रको गीतमा पहिलो पटक काम गरेकी हुन् । करिअरमै पहिलो पटक आइटम डान्स गर्न पाउँदा खुशी लागेको पूजाको तर्क थियो । यो गीतको भिडियोमा पूजाको साथमा नायक उत्तम प्रधान, किरण श्रेष्ठ र कलाकार सुलक्षण भारतीले नृत्य गरेका छन् ।

लेकाली इन्टरटेन्मेन्ट र कस्तुरी प्रोडक्सनको प्रस्तुतिमा तयार भएको चलचित्रमा लक्ष्मण सुनारको कथा र निर्देशन, महेश दवाडीको लेखन छ ।

चलचित्रमा उत्तम प्रधान, सौगात मल्ल, अर्पण थापा, बेनिशा हमाल, सुलक्षण भारती, नाजिर हुसेन, वर्षा राउत, बेगम नेपाली, बिनोद न्यौपाने, रेयर राई, प्रियना आचार्य, अर्जुन गुरुङ, सन्जोक राणा, गीता अधिकारी, कुल बहादुर अधिकारी, सरस्वती खत्री, श्याम मगरको मुख्य भूमिका छ । यस्तै, यो फिल्ममा उपेश ढकाल, मञ्जिला बाँनिया र समर्पण खतिवडा बाल–कलाकारको भूमिकामा छन् ।

निसाल पौडेलको डीओपी रहेको चलचित्रमा मिलन श्रेष्ठको सम्पादन, आशिष अविरल, सरित राई र केतन क्षेत्रीको संगीत रहेको चलचित्रका निर्माण प्रमुख सुरज आचार्य हुन् ।

चलचित्रको टिजर समेत सार्वजनिक भइसकेको छ । जसलाई दर्शकले निकै मन पराएका छन् । चलचित्र देवता र राक्षसको कथा भन्छ । यो गीत केही समयपछि नै सार्वजनिक गर्ने निर्माणपक्षले बताएको छ ।