‘ कल्ली ’ मार्फत चलचित्रमा फर्किंदै उत्तम प्रधान

सबस्त इन्टरटेनमेन्ट काठमाडौं – रेड बर्ड प्रोडक्शन र कस्तुरी प्रोडक्शनको ब्यानरमा निर्माण हुने चलचित्र ‘कल्ली’ मा कलाकारको लाइनअप बलियो बन्दै गएको छ । सौगात मल्ल, अर्पण थापा, बुद्धि तामाङ, कमलमणि नेपाल र बेनिशा हमाल पछि चलचित्रमा कलाकार उत्तम प्रधानको प्रवेशपछि चलचित्रमा कलाकारको लाइनअप बलियो बन्दै गएको हो ।

उत्तम लामो समयपछि नेपाली चलचित्रमा कमव्याक गर्न लागेका हुन् । केही समयअघि मात्र उनले अभिनेत्री निरुता सिंहसँग एक म्युजिक भिडियोमा अभिनय गरेका थिए । तुलसी घिमिरे निर्देशकीय चलचित्र ‘दर्पणछाँया’बाट नेपाली चलचित्रमा पाइला चालेका उत्तम पछिल्लो पटक ‘दर्पणछाया २’ मा विशेष भूमिकामा देखिएका थिए । त्यसपछि भने उनी नेपाली चलचित्रमा सक्रिय थिएनन् ।

चलचित्रका निर्माता किरण नेपाली र लेखक तथा निर्देशक लक्ष्मण सुनारले सिक्किम पुगेर कलाकार प्रधानलाई चलचित्रमा अनुबन्धित गरेका हुन् । प्रधानले लामो समयपछि नेपाली चलचित्रमा कमव्याक गर्न पाउँदा आफू उत्साहित भएको प्रतिक्रिया दिएका छन् । चलचित्रमा उत्तमको भूमिका के हुने भन्ने निर्माण पक्षले केही खुलाएको छैन । चलचित्रमा महेश दवाडीको पटकथा तथा संवाद छ । चलचित्रका निर्माण प्रमुख सुरज आचार्य हुन् । यो चलचित्र नयाँ वर्ष २०८२ को छेको पारेर चैत्रको २९ गतेबाट रिलिज हुँदैछ । चलचित्रको छायांकन कर्णाली प्रदेशका विभिन्न रमणीय स्थानमा गर्ने तयारी भइरहेको निर्देशक सुनारले जानकारी दिए ।