सबस्त इन्टरटेनमेन्ट,काठमान्डौ – गत बैशाख २५ गतेबाट प्रदर्शनमा आएको चलचित्र लालीबजारले अहिले बक्सअफिसमा उत्साहजनक व्यापार गरिरहेको छ । गत शनिबारसम्म ५ करोड ७६ लाख ब्यापार गरेको चलचित्रले यो हप्ता नेपाली बक्सअफिसमा ८ करोड नजिकको पुग्ने अनुमान निर्माण टिमको छ ।
यसैबीच, चलचित्रको निर्माण टिमले आमा र छोरीलाई ट्रिब्युट स्वरुप ‘साहारा तिमी छौं’ भिडियो सार्वजनिक गरेको छ । लिरिकल भर्सनमा रुचाइएको गीतको भिडियोले समेत दर्शकको मन जित्ने विश्वास निर्माण कम्पनी षट्कोण आर्ट्सको छ । आमा र छोरीको संघर्षमा आधारित मर्मस्पर्शी गीतमा अभिनेत्री स्वस्तिमा खड्का, समाइरा थापा र प्रशंसा सुवेदी लगायतका कलाकारहरु फिचर्ड छन् ।
विशेषगरी यो गीतले चलचित्रको कथासार झल्काउँछ । जयन जे वाइवाको शब्द तथा संगीत रहेको गीतमा समीक्षा अधिकारीको स्वर सुन्न सकिन्छ । यो गीतमा दिलिजा रुवाली, अलिशा शर्मा र पुर्णिमा तामाङ बाल गायन र कोरसमा गुराँस ठकुरी र गायत्री राना मगरको स्वर सुन्न सकिन्छ । यसमा आमा र छोरी बीचको प्रेम देखाइएको छ । छोरी प्रति आमाको माया र हुर्काउन गर्ने संघर्षलाई चित्रण गरिएको छ ।
बर्दियाको राजापुरमा छायांकन गरिएको सिनेमामा स्वस्तिमा खड्का, रवीन्द्रसिंह बानियाँ, समाइरा थापा, मुकुन्दकुमार श्रेष्ठ, अभय बराल, प्रेम पाण्डे, आशा पौडेल, गोविन्द सुनार, आभा अर्याल, तारा शर्मा, रमेश वादी, सरस्वती अधिकारी, प्रदीप ढकाल, जानकी कठायत, निश्चल पन्थी, विरवल चौधरी, कुन्टल लगायतको अभिनय रहेको छ । यो चलचित्रमार्फत विशाल देवकोटा र प्रसंशा सुवेदीले सानदार डेव्यु गरेका हुन् ।
यम थापाको निर्देशनमा निर्माण भएको चलचित्र ‘लालीबजार’को पटकथा र संवाद निर्देशक थापा र अर्का निर्देशक प्रदीप भट्टराईले संयुक्त रुपमा तयार गरेका हुन् । चलचित्रको कार्यकारी निर्मातामा प्रदीप भट्टराई अनि निर्मातामा म्याक्स दीपेश खत्री र रविन्द्रसिंह बानियाँ रहेका छन् ।
चलचित्रमा क्रिएटिभ निर्देशक जेबी रुवाली, द्वन्द्व निर्देशक सम्राट बस्नेत, छायांकन निर्देशक सुशन प्रजापती, सम्पादक मित्रदेव गुरुङ, प्रोडक्सन हेड रुपकप्रताप अधिकारी, कलर रेनिश फागो, भिएफएक्स समिर श्रेष्ठ र सत्यम राना, ब्याकग्राउण्ड म्युजिक रोहित शाक्य र शैलेश श्रेष्ठ, पब्लिसिटी डिजाइनर रोयल भीमसेन (ट्राइडेन्ट), कस्ट्युम डिजाइनर र स्टाइलिस जानकी कडायत, मेकअप काव्या थापा, संगीत प्रकाश सपूत, खेम सेन्चुरी र जयन जे वाइवाको छ ।
प्रतिक्रिया