सबस्त इन्टरटेनमेन्ट,काठमान्डौ – अन्तर्राष्ट्रिय फेस्टिभलमा ख्याति कमाएका निर्देशक दीपक रौनियार निर्देशित चलचित्र ‘राजागञ्ज’ १ चैत अर्थात १४ मार्च देखि नेपालका चलचित्र हलमा रिलिज हुँदैछ ।
निर्माणपक्षले विहिबार नेपाल संस्करणको थिएट्रिकल पोस्टर सार्वजनिक गर्दै औपचारिकरुपमा प्रदर्शन मिति घोषणा गरेका छन् । पोस्टरमा ४ प्रमुख कलाकारहरु आशा मगराती, दयाहाङ राई, निकिता चाण्डक र विजय बराललाई स्थान दिइएको छ ।
सोसल ड्रामा तथा एक्सन चलचित्रमा आशा मगरातीको शीर्ष भूमिका छिन ।
भेनिसमा विश्व प्रिमियर भैसकेको चलचित्र बुसान र मुम्बईजस्ता प्रतिष्ठित अन्तर्राष्ट्रिय फेस्टिभलमा समेत स्क्रिनिङ भैसकेको छ । चलचित्रमा आशा मगराती, दयाहाङ राई, निकिता चाण्डक र विजय बराल ऋचा शर्मा, गौमाया गुरुङ, आरती मण्डल, घनश्याम मिश्र, परमेश्वरकुमार झा, पशुपति राई र नीरज श्रेष्ठ आदि कलाकारहरुको अभिनय रहेको छ ।
‘राजागञ्ज’को निर्माण आदि फिल्म्सका लागि रौनियार र मगराती, बाँसुरी फिल्म्सका लागि रामबाबु गुरुङ र तन्हाउसर गेटका लागि एलन आर मिलिगनले गरेका हुन् । नर्वेजियन फिल्म इन्स्टिच्युटको सोर्फोन्डबाट पनि आर्थिक सहयोग प्राप्त गरेको छ । कार्यकारी निर्माताको रुपमा भारतीय निर्देशक अनुराग कश्यप जोडिएका छन् ।
प्रतिक्रिया