ऋचा र उत्पलको चलचित्र ‘सारंग’ ट्रेलर सार्वजनिक

सबस्त इन्टरटेनमेन्ट,काठमान्डौ – माघ २५ गतेबाट देशब्यापी प्रदर्शनमा आउन लागेको चलचित्र ‘सारंग’ को ट्रेलर बिहिबार सार्वजनिक भएको छ। सार्वजनिक ट्रेलरले परिवारको कलहका कारण बच्चामा पर्ने असर लाई प्रस्तुत गरेको छ। साथमा दुई फरक आर्थिक हैसियतका बालकहरुको मित्रतालाई पनि ट्रेलरमा देख्न सकिन्छ  । निर्देशक प्रशान्त तामाङको लेखन,निर्माण अनि निर्देशनमा बनेको चलचित्रको गीतमा दुई साथी–बालकलाकार आदित्य कार्की र सम्राट थापाबीचको प्रेम,साथ,समर्पण र आत्मीयता प्रस्तुत गरिएको छ ।

चलचित्रमा ऋचा शर्मा,उत्पल झा,समीरमणि दीक्षित,सुरज तमु,मणि के राई,अनिषा न्यौपाने,निरज ब्ल्याक,बिश्व स्याङ्बो,दीपीका थापा,सुमन सागर जंग केसी,प्रभात श्रेष्ठका साथमा बालकलाकार द्वय सम्राट र आदित्य मुख्य भूमिकामा छन् ।

बाल मनोबिज्ञान, बालअधिकार, धनी–गरिब परिवारबीचको खाड्लको यथार्थ कथा प्रस्तुत गरिएको बताइने चलचित्रको निर्मातामा प्रेम तामाङ र फूलमाया तामाङ छन् । पुष्पा लिम्बू र बिनु गुरुङ सहनिर्माता रहेको चलचित्र गोपाल रायले खिचेका हुन् । दर्शन बुद्ध फिल्मस्को ब्यानरमा निर्माण भएको चलचित्रको सम्पादन मित्र डि गुरुङले गरेका हुन् ।

चलचित्रलाई देशभर स्टेशन ५ ले बितरण गर्दैछ ।