राजागंज: पूजा सर – एकै साथ विश्वका पाँच प्रमुख एयरलाइन्समा स्ट्रिमिङ

सबस्त इन्टरटेनमेन्ट,काठमान्डौ – नेपाली चलचित्र ‘राजागञ्जः पूजा सर’ विश्वका ५ मुख्य अन्तर्राष्ट्रिय एयरलाइन्सहरू– कतार, अमेरिकन, युनाइटेड, लुफ्थान्सा तथा स्वीस एयरलाइन्सबाट एकैसाथ स्ट्रिमिङ हुन थालेको छ । यी एयरलाइन्सहरूबाट यात्रा गर्ने यात्रुले अब यो चलचित्र आकाशमै हेर्न पाउने छन् ।

सन् २०१२ मा प्रतिष्ठित बर्लिन अन्तर्राष्ट्रिय चलचित्र महोत्सवमा प्रतिस्पर्धा गरेको आदि फिल्म्सको पहिलो कथानक चलचित्र ‘हाईवे’ नेपालको पहिलो चलचित्र थियो, जसले विश्वका प्रमुख फिल्म फेस्टिभलमा प्रीमियर गरेको थियो ।

गत वर्ष संसारकै पुरानो भेनिस फिल्म फेस्टिभलमा प्रीमियर भएता पनि नेपालका बाँसुरी फिल्म्स र नर्वेको ट्यानहाउजर गेटको सहकार्यमा आदि फिल्म्सले निर्माण गरेको ‘राजागञ्जः पूजा सर ले बुसान, टालिन ब्ल्याक नाइट्स, गोथेबर्ग, सेलोनिकी, सिड्नी, मुम्बईलगायत दर्जनौं प्रतिष्ठित महोत्सवमा नेपालको उपस्थिति जनाएको थियो।

अब यसले अन्तर्राष्ट्रिय एयरलाइन्सहरूको प्रोग्रामिङमा समेत पुगेर नेपाली चलचित्रका लागि अर्को उचाइ चुनेको त छँदैछ, नेपाली चलचित्रका लागि नयाँ बजार पनि खोलिदिएको छ ।

‘कतार जस्तो ग्लोबली नम्बर १ मानिएको एयरलाइन्स नेपाल उड्छ, तर यिनले एउटा नेपाली चलचित्र प्रोग्राम गर्दैन थे । हामीलाई आफ्नो सांस्कृतिक उपस्थितिको लागि भए पनि यो स्पेसमा हाम्रो चलचित्र चाहिन्छ भन्ने लागेको हो । हाम्रै चलचित्रबाट यो यात्रा प्रारम्भ हुँदा हामी गौर्वान्वित छौं । यो हाम्रो कथाहरूको उडान मात्रै होइन, ३० हजार फिटमा उड्ने विश्व दर्शकबीच पुग्ने नेपाली चलचित्रहरूको यात्रा शुरूवात पनि हो’, राजागञ्जका निर्माता निरज श्रेष्ठ भन्छन् ।

ग्लोबल इन–फ्लाइट इन्टरटेन्मेन्ट कम्पनी पेनी ब्ल्याक मिडियाले ‘राजागञ्जः पूजा सर’ को अन्तर्राष्ट्रिय एयरलाइन्समा वितरण गरिरहेको हो । निर्माण स्रोतका अनुसार, यो कम्पनीले राजागञ्जको अन्तर्राष्ट्रिय इन–फ्लाइट वितरण अधिकार भेनिसमै किनेको थियो । चलचित्रको थियेट्रिकल विन्डो अक्टोबरमा सकिएपछि एयरलाइन्स वितरणको काम प्रारम्भ भएको हो । यो ५ वटा एयरलाइन्सको प्रोग्रामिङ प्रारम्भिकमा मात्र हो । पेनी ब्ल्याककी कन्टेन्ट डिस्ट्रिब्युसनकी भिपी हुलिएटा बोयरले थप एयरलाइन्सहरूसँगको डिल सम्झौताको क्रममा रहेको जनाएकी छिन् ।

उनी भन्छिन्— ‘मल्टि–लेयर्ड राजागञ्जः पूजा सर एयरलाइन्स चढ्ने विविध दर्शकलाई आकर्षित गर्न सक्ने उत्तम चलचित्र हो । यसको इन–फ्लाइट यात्रामा साथ दिन पाउँदा अत्यन्त गर्व महसुस गरिरहेको छु । पूजा सरलाई अझ धेरै विश्वभरका इन–फ्लाइट स्क्रिनमा हेर्न आतुर छु ।’

जनकपुरमा खिचिएको राजागञ्जः पूजा सर सत्य घटनाबाट प्रभावित छ । क्राइम थ्रिलर जनराको यो चलचित्रले दुई बच्चाको अपहरणको मुद्दा अनुसन्धान र बच्चाको सुरक्षित रेस्क्यु अपरेसनका लागि काठमाडौंबाट पठाइएकी डिटेक्टिभ इन्स्पेक्टर पूजा थापालाई पछ्याउँछ ।

पूजा थापाको भूमिकामा आशा मगराती छिन्, जसले भर्खरै अमेरिकाको स्यान डिएगोमा उत्कृष्ट अभिनेत्रीको अवार्ड जितिन् । मगराती बाहेक, यो चलचित्रमा निकिता चाण्डक, दयाहाङ राई, विजय बराल, रिचा शर्मा, आरती मण्डल, गौमाया गुरूङ, पशुपती राई, घनश्याम मिश्रा र निरज श्रेष्ठहरूको अभिनय देख्न पाइन्छ।

हालै मात्रै यो फिल्म फ्रान्समा ६२ वटा स्क्रिनमा एकैपटक वाइड रिलिज भएको थियो । विदेशको सिनेमा थिएटरमा त्यो आकारको रिलिज नेपाली चलचित्रको लागि कहिँ पनि पहिलो हो । फ्रान्समा १७ हजार बढी दर्शकले यो चलचित्र हेरेका थिए । ‘राजागञ्ज’ ले नेपालमा मात्रै नभई अन्तर्राष्ट्रिय समीक्षकबाट बलियो समीक्षा, प्रशंसा बटुल्दै आएको छ।

यही महिना यो बेलायतको मुख्य टेलिभिजन च्यानल फोरमा समेत प्रदर्शन भयो । च्यानलले प्रसारण बाहेक महिना दिनसम्म आफ्नो प्लेटफर्मबाट स्ट्रिम पनि गर्यो ।

नेदरल्यान्डमा चलचित्रले ‘फ्री टू बी मी अवार्ड’ जितेको छ । साथै, प्रतिष्ठित विश्वविद्यालय हार्वर्ड, न्यूयोर्क, बोस्टनमा पनि यसको प्रदर्शन भयो ।

नेपालमा भने ‘राजा गञ्ज’ सरकारको सेन्सरसिपमा परेको थियो । १९ बढी कट सेन्सर बोर्डले गर्न लगायो । जसका कारण चलचित्रको मर्म नै मरेको निर्माण पक्षले गुनासो गरेका थिए । नेपाली दर्शक पनि खासै सिनेमा हलसम्म आएनन् ।
तर निर्माता पूर्ण सिंह बराईलीका अनुसार, राजागञ्ज फेरि नेपाली दर्शकमाझ फर्किन लागेको छ। नर्वेको ह्वाइट र्याबिट र अमेरिकाको किनेमामा दुई फ्युचरिस्टिक प्लेटफर्मबाट संसारभर यो डिजिटल रिलिजको तयारीमा छ, जसमा नेपाल पनि हुनेछ।

‘हामी एउटा नयाँ एक्सपेरिमेन्ट गर्ने तयारीमा छौं,’ बराईलीले भने– ‘किनेमामार्फत संसारभरि दुई सय बढी स्क्रिनिङ र कन्भर्सेसन गर्ने हाम्रो प्लान छ । अनाउन्स्मेन्ट केही दिनमा आउँछ ।’

‘नेपाल अहिले परिवर्तनको संघारमा छ । हाम्रो फिल्म सान्दर्भिक छ । जेन–जेड मूभमेन्टले पनि के देखायो भने नेपालले ‘सोल सर्चिङ’ गर्न जरुरी छ । यो चलचित्रको स्क्रिनिङ र कन्भर्सेसनमार्फत हामी त्यो यात्रामा सघाउन चाहन्छौं,’ बराईलीले थपे ।

दीपक रौनियारको निर्देशन रहेको ‘राजागञ्जः पूजा सर’ को लेखन दीपकसहित अभिनेत्री मगराती र डेभिड बार्करले गरेका हुन् । यसका निर्माताहरूमा रौनियार, रामबाबु गुरूङ, आशा मगराती, एलन आर मिलिगन, र निरज श्रेष्ठ छन् । कार्यकारी निर्मातामा सुपरस्टार दयाहाङ राई, ग्याङ्स अफ वासिपुर फेम्ड अनुराग कश्यप, अस्कर नोमिनेटेड निर्माता जस्लिन बार्न्स, नेपाल अमेरिका फिल्म फेस्टिभलका पूर्ण सिंह बराईलीलगायत छन् ।

सेल्डन चाउले यो चलचित्रको सिनेमाटोग्राफी गरेका छन् भने जे हिम ली र एलेक्स गर्भिट्सले सम्पादन गरेका हुन् ।