सबस्त इन्टरटेनमेन्ट,काठमान्डौ – जीएम मुभिज प्रोडक्सनको ब्यानरमा निर्माण भएको चलचित्र ‘मितज्यू’ हङकङ, जापान, साउथ कोरिया, माल्टा, सिंगापुर र पोल्याण्डमा ‘सोल्ड आउट’ भएको छ। मंगलबार निर्माण पक्षले यी ६ देशमा चलचित्रको प्रदर्शन अधिकार बिक्री भएको जानकारी दिएको हो।
चलचित्रका निर्माता जनक घर्ती मगरका अनुसार ‘मितज्यू’को हङकङ प्रदर्शन अधिकार पाथिभरा इन्टरटेनमेन्टले खरिद गरेको छ। त्यस्तै जापानका लागि वाउ इन्टरटेनमेन्ट, साउथ कोरियाका लागि नेपाल मगर संघ, माल्टाका लागि नेप फाइभ इन्टरटेनमेन्ट र पोल्याण्डका लागि सोल्टी इभेन्टले अधिकार किनेका छन्।
उनले अन्य देशहरूसँग पनि प्रदर्शनका लागि छलफल भइरहेको जानकारी दिए। हालसम्म यी ६ देशमा भने प्रदर्शन अधिकार बिक्री भइसकेको छ।
चलचित्रको प्रदर्शन मिति नजिकिँदै जाँदा दर्शकमाझ यसको कौतुहलता बढ्दो छ। चलचित्रमा सौगात मल्ल, दयाहाङ राई र अन्तर्राष्ट्रिय रूपमा चर्चित नृत्यांगना तेरिया फौजा मगरको अभिनय रहेको छ। तेरियाको यो डेब्यु चलचित्र भएकाले पनि चलचित्र सुरुदेखि नै चर्चामा रहँदै आएको छ।
चलचित्रका सार्वजनिक गीतहरूले पनि राम्रो प्रतिक्रिया पाएका छन्। ‘गैराघरे काँइली’ र ‘भुनभुन माहुरी’ गीत दर्शकमाझ लोकप्रिय बन्दै गएका छन्। यस चलचित्रको गीत,टिजर लगायतले छोटो समयमै राम्रो चर्चा बटुल्न सफल भएको छ।
ग्रामीण परिवेशमा आधारित यस चलचित्रमा दयाहाङ राई, सौगात मल्ल र तेरिया फौजा मगरका साथै पुस्कर गुरुङ, शिशिर वाङ्देल, राज थापा, सुवर्ण थापा, अनु थापा, स्मिता लामिछाने, अरुण पुन मगर, उत्तमराज पाण्डे, सविन कट्टेल, उमेश सोनाम, पवित्रा खड्का, चाहाना राना मगर, अनुशा राई तथा खड्गबहादुर पुन मगर (खबपु) लगायत कलाकारहरूको अभिनय रहेको छ।
यसै चलचित्रमार्फत तेरिया मगरले अभिनेत्रीका रूपमा डेब्यु गरेकी हुन्। साथै, फिल्मको एक गीतमा अभिनेत्री रुषा न्यौपानेको विशेष नृत्य पनि समावेश गरिएको छ। अनिल बुढा मगरको निर्देशनमा बनेको यस चलचित्रका निर्माता जनक घर्ती मगर हुन्। लोकेश बज्राचार्यको सम्पादन, शिशिर बिशंखेको छायांकन रहेको चलचित्रमा श्रीकृष्ण बम मल्लको संगीत छ। गीतमा स्वर श्रीकृष्ण बम मल्ल, मेलिना राई र लक्ष्मी मल्लले दिएका छन्। मुख्य सहायक निर्देशक फिरोज खड्का रहेका छन्।
आरआर फिल्म्सले वितरण गर्ने यस चलचित्रको डिजिटल अधिकार ओएसआरले खरिद गरेको छ। चलचित्र आगामी जेठ ८ गतेबाट नेपालभरका हलमा प्रदर्शन हुँदैछ।
प्रतिक्रिया