जीतु र प्रियानाले शुभारम्भ गरे ‘लक्ष्मी हेयर एन्ड ब्युटी स्टुडियो’

सबस्त इन्टरटेनमेन्ट, काठमाडौं । जेन्जी आन्दोलनका क्रममा काठमाडौंको कलंकी र महाराजगञ्जस्थित भाटभटेनीमा आगलागी हुँदा लक्ष्मी ठाकुरले सञ्चालन गर्दै आएका दुई वटा ‘लक्ष्मी हेयर एन्ड ब्युटी स्टुडियो’ जलेर नष्ट भए । तीमध्ये कलंकीस्थित स्टुडियो केही समयपछि नै पुनः सञ्चालनमा ल्याइएको थियो। उक्त स्टुडियो भने आगलागीको ठीक एक वर्षपछि पुनर्निर्माण गरेर पुनः सञ्चालनमा ल्याइएको छ । आगलागी भएको दिनलाई स्मरण गर्दै लक्ष्मीले बुधबार उक्त स्टुडियोको पुनः शुभारम्भ गरेका हुन्।

प्रदर्शनको तयारीमा रहेको नेपाली फिल्म ‘कार्की साइँला’का अभिनेता तथा हास्यव्यंग्य कलाकार जितु नेपाल र सोही फिल्मकी अभिनेत्री प्रियना आचार्य ‘मुन्नी’ले बुधबार रिबन काटेर स्टुडियोको संयुक्त उद्घाटन गरे। महाराजगञ्ज भाटभटेनीस्थित यो स्टुडियो ‘लक्ष्मी हेयर एन्ड ब्युटी स्टुडियो’को पहिलो फ्रेन्चाइजका रूपमा सञ्चालनमा आएको थियो। पुनर्निर्माणपछि यो ब्रान्डको छैटौँ शाखाका रूपमा सञ्चालनमा आएको हो।

हाल काठमाडौं उपत्यकामा ‘लक्ष्मी हेयर एन्ड ब्युटी स्टुडियो’का कोटेश्वर भाटभटेनी, पुलचोक भाटभटेनी, कलंकी भाटभटेनी, स्काईवाक कमलादी र भैंसेपाटीमा शाखा सञ्चालनमा छन्। महाराजगञ्जको शाखासमेत पुनः सञ्चालनमा आएसँगै उपत्यकामा शाखाको संख्या ६ पुगेको छ।

पुनः शुभारम्भ कार्यक्रममा अभिनेता जितु नेपालले आगलागीबाट जलेको स्टुडियोलाई एक वर्षमै पुनर्निर्माण गरी सञ्चालनमा ल्याउनु लक्ष्मी ठाकुरको साहसिक कदम भएको बताए।

उनले आफूले लामो समयदेखि कोटेश्वरस्थित ‘लक्ष्मी हेयर एन्ड ब्युटी स्टुडियो’मा हेयरसम्बन्धी सेवा लिँदै आएको स्मरण गर्दै आगलागीमा विभिन्न शाखा जलेको घटनाले आफूलाई दुःखी बनाएको बताए। जलेको स्टुडियोलाई नयाँ स्वरूपमा उद्घाटन गर्न पाउँदा आफूलाई समेत ऊर्जा मिलेको उनको भनाइ थियो।

अभिनेत्री प्रियना आचार्यले पनि महाराजगञ्जको १७ वर्ष पुरानो स्टुडियो आगलागीको एक वर्षपछि पुनः स्थापित भएकोमा खुसी व्यक्त गरिन्। उनले आगामी पाँच वर्षभित्र देशभरका सहरमा ५१ वटा शाखा विस्तार गर्ने लक्ष्मी हेयर एन्ड ब्युटी स्टुडियोको योजनाले सफलता पाओस् भन्दै शुभकामना दिइन्। आफूले समेत यो स्टुडियोलाई रोजाइको ब्युटी स्टुडियोका रूपमा लिने गरेको उनले बताइन्।

मुम्बईमा हेयर डिजाइनरका रूपमा काम गरेका लक्ष्मी ठाकुर २७ वर्षअघि नेपाल आएर ठमेलमा ‘लक्ष्मी हेयर एन्ड ब्युटी स्टुडियो’को सुरुवात गरेका थिए। त्यसको १० वर्षपछि अर्थात् १७ वर्षअघि महाराजगञ्जको भाटभटेनीमा पहिलो फ्रेन्चाइज शाखा सञ्चालनमा ल्याइएको उनले स्मरण गरे।

आगलागीमा जलेको स्टुडियोलाई एक वर्षको अवधिमा पुनर्निर्माण गरेर पुनः सञ्चालनमा ल्याउन सफल भएको बताउँदै लक्ष्मीले भने, ‘भाटभटेनी आगलागीमा हाम्रा दुई वटा स्टुडियो खरानी भए पनि हामी अहिले खरानीबाट माथि उठ्ने प्रयासमा छौँ।’

लक्ष्मीका अनुसार उनको स्टुडियोले दर्जनौँ नेपाली फिल्ममा हेयर स्टाइलिस्ट, कन्सल्टेन्ट तथा डिजाइनरका रूपमा समेत योगदान दिँदै आएको छ।