सबस्त इन्टरटेनमेन्ट,काठमान्डौ – जनक घर्ती मगरले निर्माण गरेको चलचित्र ‘मितज्यू’को ‘गैराघरे काँइली’को चर्चा चुलिएको छ। यस गीतलाई युटुवमा रिलिज गरेको छोटो समयमा नै ११ लाख भ्युज कमाउन सफल भएको छ। यो चलचित्रको प्रचारप्रसारको लागि रिलिज भएको पहिलो गीत हो।
गीतले छोटो समयमा नै ११ लाख भ्युज बटुलेपछि निर्माण पक्ष उत्साहित बनेका छन। निर्माता मगरले आफ्नो चलचित्रको यतिधेरै पटक हेरेर साथ दिएकोमा सबैलाई धन्यवाद दिएका छन्। उनी भन्छन्,‘हाम्रो चलचित्र मितज्यू को गीत ‘गैराघरे काँईली’ लाई युट्यूबमा ६ दिनमा १० लाख भन्दा बढि पटक हेरिदिनुहुने यहाँहरु सम्पुर्णलाई धेरै धेरै धन्यवाद।’
यो समाचार तयार पार्दासम्म गीतलाई २४ हजारभन्दा बढिले लाइक गरेका छन्। साथै १३ सय भन्दा बढिले कमेन्ट गरेका छन्। जसमा अधिकांशले गीत र कलाकारको प्रशंसामा समय खर्चिएका छन्।
कमेन्टकर्ता अनिल एकले तेरिया मगरको डान्स मन परेको उल्लेख गरेका छन्। उनी लेख्छन्,‘तेरिया मगरका फ्यान सबै यता लाइक गरम् है।’
अधिकांशले कलाकारहरुको अभिनयमा तारिफ खर्चिएका छन्। जसमा सौगात मल्लको अर्को रुप देख्न पाइयो भन्दै दर्शक उत्साहित बनेका छन्। एकै खाल्को भुमिका दिएको भन्दै आलोचनामा पर्ने गरेको सौगातलाई यस गीतमा देखेको रुपमा भने दर्शकले फरक स्वाद पाउने अपेक्षा गरेका छन्।
बिष्णु भिसम लेख्छन्,‘सौगात दाईको अर्को रूप देख्न पाईयो।’
दर्शकको सकरात्मक कमेन्टले पनि निर्देशक अनि बुढा मगर दंग छन्।
सार्वजनिक गीतको भिडियोमा चलचित्रका मुख्य तीन कलाकार दयाहाङ राई,सौगात मल्ल र तेरिया फौजा मगरलाई प्रस्तुत गरिएको छ। जसमा सौगात मल्ल र तेरियाले लोकलयको गीतमा गाउँले पहिरनमा नै नाचेका छन्। जुन गीतमा सौगात र तेरिया नाचेका छन्। दयाहाङ भने उक्त गीतमा कथा अनुसार प्ले गरिएको देख्न सकिन्छ। यस गीतलाई श्रीकृष्ण बम मल्ल र मेलिना राईले गाएका छन्। साथै यस गीतमा शब्द र संगीत पनि गायक मल्लकै रहेको छ। मिङ्मा डि लेप्चाको कोरियोग्राफी रहेको यस गीतलाई दर्शकले अत्यधिक रुचाएका छन्।
अनिल बुढा मगरको निर्देशन,जनक घर्ती मगरको लगानी रहेको यस चलचित्रमा दयाहाङ राई, सौगात मल्ल, तेरिया फौजा मगर, पुस्कर गुरुङ, शिशिर वाङ्देल, राज थापा, सुवर्ण थापा, अनु थापा, स्मिता लामिछाने, अरुण पुन मगर, उत्तम राज पाण्डे, सविन कट्टेल, उमेश सोनाम, पवित्रा खड्का, चाहाना राना मगर, अनुशा राई, खड्गबहादुर पुन मगर (खबपु) लगायतको अभिनय रहनेछ। यसै चलचित्रबाट तेरिया मगरले अभिनेत्रीका रुपमा डेब्यु गरेकी हुन्। जीएम मुभिज प्रोडक्सनको ब्यानरमा निर्माण भएको यो चलचित्रको,सम्पादक लोकश बज्राचार्य, छायाकार शिशिर बिशंखे हुन।
चलचित्रको मुख्य सहायक निर्देशकको जिम्मा फिरोज खड्काको छ। सहायक निर्देशकमा अनिल दाहाल, सञ्जु नेपाली र एल्मिना राई रहेका छन्। प्रोडक्सन डिजाइनर किशोर नेपाल, ड्रेस डिजाइनर संगीता रोका मगर,प्रतीक्षा भाट क्षेत्री हुन्।
चलचित्रको द्वन्द्व निर्देशन प्रभात विष्ट,साउन्ड डिजाइनर नवीन श्रेष्ठको छ। साथै चलचित्रका गीतमा संगीत श्रीकृष्ण बम मल्लले दिएका छन् भने चलचित्रका गीतमा संगीतकार मल्ल,मेलिना राई र लक्ष्मी मल्लले गाएका छन्। आरआर फिल्म्स वितरक रहेको यो चलचित्रको डिजिटल अधिकार ओएसआरले खरिद गरेको छ। फिल्म आगामी जेठ ८ गतेबाट नेपालभरका हलमा प्रदर्शनमा आउँदैछ।
प्रतिक्रिया