राजनीतिमा आउने चर्चामा धनुष

सबस्त इन्टरटेनमेन्ट,काठमाडौँ । तमिल फिल्मका चर्चित अभिनेता धनुषले राष्ट्रिय स्वयंसेवक संघ (आरएसएस) का एक वरिष्ठ नेतासँग भेट गरेपछि उनी राजनीतिमा प्रवेश गर्न लागेको चर्चा तीव्र बनेको छ। अभिनेता विजय राजनीतिमा सक्रिय हुँदै तमिलनाडुको मुख्यमन्त्री बनेको केही महिनापछि धनुषको सम्भावित राजनीतिक यात्राबारे अड्कलबाजी सुरु भएको हो।

स्रोतहरूका अनुसार धनुष र आरएसएसको दक्षिण क्षेत्र हेर्ने एक वरिष्ठ नेताबीच गत अगस्ट र सेप्टेम्बरमा दुई पटक छलफल भएको थियो। यी भेटघाटसँगै धनुषले आफ्नो फ्यान क्लबको सञ्जालमा रणनीतिक फेरबदल गर्न थालेपछि राजनीतिक वृत्तमा उनको गतिविधिलाई अर्थपूर्ण रूपमा हेरिएको छ।

धनुषले आफ्नो फ्यान क्लबलाई कल्याणकारी संस्थाका रूपमा रूपान्तरण गरेका छन्। ‘धनुष नर्पणी इयक्कम’ नाम दिइएको यस संस्थामार्फत उनले सामाजिक गतिविधि अघि बढाइरहेको बताइएको छ। यसै क्रममा गत आइतबार चेन्नईको बाहिरी क्षेत्रमा रहेको एक निजी कलेजमा आयोजित बृहत् भेलामा धनुषले संस्थासँग आबद्ध करिब २ हजार ५०० महिला समर्थकसँग प्रत्यक्ष भेटघाट गरेका थिए।

यसका साथै उनले चाँडै विद्यार्थीलाई शैक्षिक पुरस्कार वितरण गर्ने योजना बनाएको पनि बताइएको छ। रोचक कुरा के छ भने, अभिनेता विजयले पनि आफ्नो राजनीतिक पार्टी घोषणा गर्नुअघि शैक्षिक तथा सामाजिक कार्यक्रममार्फत जनसम्पर्क विस्तार गरेका थिए। त्यसैले धनुषका पछिल्ला गतिविधिलाई विजयले अपनाएको रणनीतिकै पुनरावृत्तिका रूपमा हेरिएको छ।

यद्यपि, धनुषले राजनीतिमा प्रवेश गर्नेबारे अहिलेसम्म कुनै औपचारिक घोषणा गरेका छैनन्। द इन्डियन एक्सप्रेसका अनुसार आरएसएसका नेतासँग भएको भेट कुनै राजनीतिक सहमतिका लागि गरिएको हो भन्नेबारे पनि सार्वजनिक रूपमा पुष्टि भएको छैन।

धनुषका पछिल्ला गतिविधिले भने तमिलनाडुको राजनीतिक वृत्तमा नयाँ बहस सिर्जना गरेको छ। अहिले त्यहाँ दुई मुख्य प्रश्न उठ्न थालेका छन्,के धनुष साँच्चै विजयकै बाटो पछ्याउँदै राजनीतिमा प्रवेश गर्न लागेका हुन्? यदि उनी राजनीतिमा आए भने उनको उपस्थितिले तमिलनाडुको राजनीतिक समीकरणमा कस्तो प्रभाव पार्ला?