सबस्त इन्टरटेनमेन्ट,काठमान्डौ – बिहीबार घटस्थापनामा रिलिज हुन लागेको ‘बेहुली फ्रम मेघौली’का लागि सोमबार नेपालीचलचित्रघरहरुले एडभान्स बुकिङ खुल्ला गरेका छन् । उनीहरुले खोलेको बुकिङले अभिनेत्री स्वस्तिमा खड्काको निर्माण डेब्यू सिनेमालाई बम्बर ओपनिङ दिलाउने आधार तयार पारेको छ।
देशको सबैभन्दा ठूलो मल्टीप्लेक्स चेन क्यूएफएक्सले देशभर ‘बेहुली फ्रम मेघौली’लाई कूल ७३ शो उपलब्ध गराएको छ जसमा काठमाडौं उपत्यकामा ३२ र मोफसलमा ४१ शो बुकिङ खोलेको छ। यस्तै, आइएनआई सिनेमाजले आफ्नो चेनमा रहेका काठमाडौंका दुई हल र बुटवलमा गरि १४ शो दिएको छ भने वान सिनेमाजले नयाँ बानेश्वर र कालीमाटीमा गरी ९ शो दिएको छ । यसैगरी बिग मुभिजले ६ शो र एफक्युबले ७ शो दिएका छन् ।
केही हलहरुमा एड्भान्स बुकिङ खुल्ला हुन बाँकी नै छ । सम्भवतः पहिलो दिनका लागि चलचित्रले दुई सय बढि सो पाउनेछ। चलचित्रलाई साजन काफ्ले र आकाश बरालको संयुक्तरुपमा निर्देशन गरेका हुन्।
चलचित्रमा स्वस्तिमा खड्का र निश्चल बस्नेतको साथमा बसुन्धरा भुषाल, विजय बराल, सिमरन खड्का, लोकेन्द्र लेखक, रक्षा थापा, सिरु बिष्ट, आमिर गौतम, टीका पहारी लगायतको अभिनय रहेको छ । चलचित्रले उमेर पुगेकी युवतीमाथि समाज र परिवारले विवाहका लागि दिने दबाब र सोका कारण उत्पन्न परिस्थितिको कथा पेस गर्नेछ ।
कमेडीप्रधान ट्रेलरबाट दर्शकहरुलाई आकर्षित गरेको यो चलचित्रले पारिवारिक दर्शकलाई पूर्ण मनोरञ्जन दिने अपेक्षा गरिएको छ।
ब्ल्याक हर्स पिक्चर्स र मेघौली फिल्मस्को ब्यानरमा निर्माण भएको चलचित्रमा सजन काफ्ले र आकाश बरालको लेखन तथा निर्देशन रहेको छ । यो उनीहरुको डेव्यु निर्देशकिय चलचित्र हो । अभिनेत्री स्वस्तिमा खड्कालाई निर्माणमा निर्देशक तथा श्रीमान निश्चल बस्नेतले सघाएका छन् । चलचित्रका कार्यकारी निर्माता फिरोज खड्का र शंकर पाण्डे हुन् ।
अभिनेता विजय बराल कास्टिङ डिरेक्टर रहेको चलचित्रमा नरेन्द्र मैनालीको छायांकन, प्रदीप लामा र केवीका खत्रीको कोरियोग्रफी, जयन जे वाइवा र कुशल पोखरेलको संगीत, निमेष श्रेष्ठको सम्पादन, घनश्याम श्रेष्ठको प्रोडक्सन डिजाइन र केशव पाण्डे र लक्ष्मण पाण्डेको स्टील फोटोग्राफी छ । चलचित्रलाई एप्पल इन्टरटेनमेन्ट र डिसिएनले वितरण गर्दैछन् ।
चलचित्र ‘बेहुली फ्रम मेघौली’ असोज १७ गते रिलिज हुनेछ । दसैँको अवसर पारेर चलचित्र घटस्थापनाका दिन रिलिज हुन लागेको हो ।
प्रतिक्रिया