‘लाज शरणम्’ को क्यारेक्टर पोस्टरमा सीताराम कट्टेल

सबस्त इन्टरटेनमेन्ट,काठमान्डौ – जेपिटी क्रियसनको ब्यानरमा निर्माण भएको चलचित्र ‘लाज शरणम्’ को नयाँ पोस्टर सार्वजनिक भएको छ । पोस्टरले चलचित्रमा रहेको क्यारेक्टरलाई प्रस्तुति दिंदै दर्शकको ध्यान आकर्षित गरेको छ । पोस्टरमा चलचित्रका मुख्य कलाकारहरू सीताराम कट्टेल (धुर्मुस), मुकुन्द श्रेष्ठ, महेश त्रिपाठी, विजय बराल, अर्पण थापा र कमलमणि नेपाललाई प्रस्तुत गरिएको छ । विशेष रूपमा पोस्टरमा अभिनेता सीताराम कट्टेल (धुर्मुस)को गेटअपले गर्दा चर्चा भैरहेको छ । नेताको भूमिकामा रहेका कट्टेललाई दौरा–सुरुवाल र ज्वारीकोटमा देखाइएको छ । उनी हात उठाएर अभिवादन गरिरहेका छन्, जसले उनको राजनीतिक चरित्रको संकेत गर्छ ।

अभिनेता सीताराम कट्टेल (धुर्मुस)को गेटअपले पूर्वमन्त्री तथा कांग्रेस नेता मोहम्मद आफतव आलमलाई झल्काएको अनुमान गरिएको छ । साथै, पोस्टरमा कफिन बोकेका स्थानीयहरूको दृश्यलेचलचित्रको गहिरो कथावस्तु झल्काएको छ ।

‘लाज शरणम्’ ले केही समयअघि सार्वजनिक गरेका तीन वटा पोस्टरमार्फत आफ्नो कथाको झलक देखाएको थियो । चलचित्रले अन्य सामाग्री नआउँदै चर्चा पाएको छ, जसले अब आउने टीजर तथा ट्रेलर लगायताका सामाग्रीलाई प्रतीक्षित बनाएको छ ।

वर्षकै प्रतिक्षित मध्उे एक मानिएको ‘लाज शरणम्’ फागुन १४ गते महाशिवरात्रिको अवसरमा प्रदर्शन हुनेछ । चलचित्रको निर्देशन कुमार कट्टेल ‘जिग्री ब्रो’ ले गरेका हुन् । चलचित्रमा विजय बराल, महेश त्रिपाठी, अर्पण थापा, रेणु योगी, विजय लामा, मुकुन्द श्रेष्ठ, माला लिम्बु, अर्जुन घिमिरे, सागर लम्साल, हरिष निरौला, प्रियाना आचार्यलगायतका कलाकार छन् ।

चलचित्रका नवीन श्रेष्ठ निर्माता, राम नरेश शाह र सृजना खड्का सह–निर्माताको रूपमा रहेका छन् । सुदीप बरालले छायांकन गरेको चलचित्र ‘लाज शरणम्’ ले मनोरञ्जनसँगै सामाजिक र गम्भीर सन्देश दिने संकेत गरेको छ ।