सबस्त इन्टरटेनमेन्ट,काठमान्डौ – यो वर्ष प्रतिक्षाको रुपमा हेरिएको चलचित्र ‘राम नाम सत्य’को छायांकन पूर्वी चितवनको रत्ननगरबाट सुरु गरिएको छ । झण्डै ८० प्रतिशत छायांकन नै चितवनमा गर्ने तयारीका साथ काम सुरु गरिएको निर्देशक माइकल चन्दले जानकारी दिए । उनका अनुसार, ४० दिन चितवनमा चलचित्र खिचेर १० दिन मुस्ताङको सेड्यूलमा खिचिनेछ ।
चितवनका प्रहरी प्रमुख एसपी गोविन्द पुरीले रत्ननगर जिरौनास्थित धर्मधाम कृष्ण मन्दिरबाट छायांकनको शुभारम्भ गरेका थिए । ‘राम नाम सत्य’को छायांकन चितवनमा हुँदा चितवनलाई फिल्म सिटीको रुपमा चिनाउन र पर्यटन प्रवद्र्धनमा फाइदा हुने लाइन प्रोड्यूसर राजेन्द्र आचार्यले बताए ।
यो चलचित्र यही वर्षको चैत्र २७ गतेबाट रिलिज गर्ने तयारी गरिएको छ । यो चलचित्रमा विराज भट्ट, सुशील श्रेष्ठ, आयुषसिंह ठकुरी, सुपुष्पा भट्ट, दिव्या रायमाझी, आशा पौडेल, खुशी कार्की, सुनिल थापा, प्रशान्त ताम्राकार, कनिज कोइराला, रवि गिरी, दिनेश डीसी लगायतका कलाकारहरुको अभिनय रहनेछ । साथै, चलचित्रमा राजेन्द्र आचार्य, अर्जुन सुनार, रामेश्वर शाह, पुजन लामिछानेको विशेष भूमिका रहनेछ ।
उपेन्द्र शाही र स्वेता बिमली निर्माता रहेको चलचित्रमा किशोर भट्ट र राजेन्द्र भट्ट कार्यकारी निर्माताको रुपमा छन् । मोती कार्की क्रियटिभ निर्माताको रुपमा रहेको चलचित्रमा मानकृष्ण महर्जनको डीओपी, श्री श्रेष्ठको एक्सन निर्देशन, अर्जुन पोखरेल, एसडी योगी, विमल गिरी र नवाज अन्सारीको संगीत छ । विजय बस्यालको पब्लिसिटी डिजाइन रहेको चलचित्रमा विदुषी थापाको प्रोडक्सन डिजाइन रहेको छ ।
एक्सन, सस्पेन्स र प्रेमको जनरामा यो चलचित्र निर्माण गरिनेछ । निर्देशक माइकल चन्दले यो चलचित्रलाई आफ्नो ‘ड्रिम प्रोजेक्ट’ बताउँदै आएका छन् ।
प्रतिक्रिया