सबस्त इन्टरटेनमेन्ट,काठमान्डौ – मंसिर २६ गतेबाट अल नेपाल प्रदर्शनमा आउन लागेको नेपाली चलचित्र ‘पीआर’ले जापानमा आफ्नो प्रदर्शन अधिकार बिक्री गरेको छ। जापानमा चलचित्र वितरण गर्दै आएको युना डिजिटलले सो अधिकार खरिद गरेको हो।
चलचित्रका निर्देशक शोभित बस्नेतले जापानमा चलचित्र ‘सोल्ड आउट’ भइसकेको जानकारी दिएका छन्। उनले भने,‘अहिले जापानका लागि यो चलचित्र राम्रो रकममा बिक्री गरिसकेका छौँ। अन्य देशका चलचित्र वितरकहरुसँग पनि छलफल भइरहेको छ र केही दिनमै थप जानकारी दिनेछौँ।’
निर्देशक बस्नेतका अनुसार, ‘पीआर’ प्रेम, संघर्ष र आप्रवासनसँग जोडिएको भावनात्मक कथामा आधारित भएकाले पनि विदेशमा रहेका नेपाली दर्शकमाझ चलचित्रप्रतिको चासो उच्च देखिएको छ। उनका भनाइमा, “चलचित्रमा विदेशमा रहेका छोराछोरीको जीवन र नेपालमा रहेका अभिभावकले उनीहरुप्रति गरेको अपेक्षालाई कथाको केन्द्र बनाइएको छ।”
हालै सार्वजनिक भएको चलचित्रको गीत ‘टाटा बाइ बाइ’ ले पनि सामाजिक सञ्जालमा राम्रो लोकप्रियता पाइरहेको छ। गीत युट्युबमा रिलिज भएको केही दिनमै ट्रेन्डिङमा पुगेको छ भने टिकटकमा समेत यसको शब्द र धुनमा बनेका छोटा भिडिओहरू व्यापक बनेका छन्।
चलचित्रमा नीर शाह, गौरी मल्ल, आर.ए. सुरज पौडेल, विनिता कार्की, राजन कुँवर, पूजा चौधरी, आश्मा अधिकारी, मस्तानी, बिमला खत्री, गणेश बुढाथोकी, म्याक्स बाबू , कृष्ण थापा, र नवीन घायल लगायतका कलाकारको अभिनय रहेको छ। विशेष भूमिकामा रविन्द्र खड्का, उत्तम के.सी., र दिक्पाल कार्की देखिने छन्।
चलचित्रका प्रस्तुतकर्ता रञ्जित साह र सन्तोष तिवारी हुन् भने निर्माता लक्ष्मण सापकोटा र प्रदीप दाहाल हुन्। गणेश बुढाथोकीले लेखन तथा बन्दे प्रसादले सम्पादन गरेका यो चलचित्रको छायांकन सौरभ सायमी र सौरभ लामाले गरेका हुन्। वितरणको जिम्मा आर.आर. फिल्म्सले लिएको छ।
निर्माण पक्षले जापानमा अधिकार बिक्रीसँगै अन्य देशका नेपाली दर्शकमाझ पनि ‘पीआर’को प्रतीक्षा बढेको जनाएको छ। यसअघि यो चलचित्रको अष्ट्रेलियाका विभिन्न शहरहरुमा विशेष शो गरिएको थियो। जहाँ हजारौ दर्शकले हेरेका थिए।
प्रतिक्रिया