‘तेल भिसा’ ट्रेलर : सुत्केरी स्याहार्न अमेरिका पुगेकी आमा जब जेलमा पर्छिन्

सबस्त इन्टरटेनमेन्ट,काठमान्डौ – विपिन कार्की, वर्षा राउत, पूजा चन्द र ऋचा घिमिरे स्टारर चलचित्र ‘तेल भिसा’को ट्रेलर सार्वजनिक भएको छ । ३ मिनेट ३६ सेकेन्ड रनटाइमको ट्रेलरले सुत्केरी बुहारी स्याहार्न नेपालदेखि अमेरिका पुगेकी एक सासूको उल्झनको कथा भन्छ ।

चलचित्रमा विपिन दोहोरो भूमिकामा छन् । एकातिर उनी नेपालमा रहेका पिताको रोलमा छन् भने अर्कोतिर अमेरिकामा रहेका छोराको भूमिकामा । आमा अर्थात् सासूको भूमिकामा पूजा चन्द देखिएकी छन् ।

बुहारी (वर्षा राउत) गर्भवती भएपछि उनलाई स्याहार्न सासू अमेरिका पुग्छिन् । तर त्यहाँ उनले अध्यागमनको झमेला व्यहोर्नुपर्छ । त्यसपछि सुरु हुन्छ कानूनी लडाइँ । अध्यागमन अदालतले उनलाई जेलमा पठाउँछ । अब उनी कसरी त्यहाँ छुट्लिन् ? यी कथाको सेरोफेरोमा चलचित्रको ट्रेलर घुमेको छ ।

लामो समयदेखि अमेरिकामा बस्दै आएकी ऋचा घिमिरे चलचित्रमा वकिलको भूमिकामा छिन् । उनका श्रीमान शंकर घिमिरेले निर्देशन गरेको यो चलचित्रले अमेरिकास्थित नेपाली डायस्पोराको यथार्थ र मर्मस्पर्शी कथा भन्छ ।

चलचित्रमा बुद्धि तामाङ, फ्रान्सिस शेरमन, ज्याक बेल, सुचित्रा उप्रेती र अनिल पाण्डेको समेत अभिनय छ । अमेरिकाको मेरिल्याड र नेपालका विभिन्न भूभागमा चलचित्र खिचिएको छ । वेलडन क्रिएसनले चलचित्र निर्माण गरेको हो । अनिल पाण्डे र शिवराज कार्की निर्माताको रुपमा छन् ।