सबस्त इन्टरटेनमेन्ट,काठमान्डौ – गलबन्दी प्रोडक्सनको प्रस्तुतिमा बनेको साथै गायक तथा नायक प्रकाश सपुतको डेव्यु निर्देशन रहेको चलचित्र ‘वसन्त’ को गीत ‘हेर्दै आँखामा’ सार्वजनिक भएको छ । नेपालका विभिन्न लोकेशन र भारतको गोवामा छायांकन गरिएको गीतमा प्रकाश सपुत र स्वस्तिमा खड्कालाई रोमान्टिक अवतारमा फिचर्ड गरिएको छ ।
चलचित्रको गीत सार्वजनिक भएको केहि घण्टा मै युट्युव ट्रेण्डिङ्गमा पर्न सफल भएको छ। नेपालको म्युजिक सेक्सनमा गीत १४ नम्बरमा रहेको छ । २ लाख बढी दर्शकले हेरेको गीतको प्रतिक्रिया पनि अब्बल रहेको छ। यो गीतले चलचित्रको प्रमोशनमा मद्दत मिल्ने अपेक्षा निर्माण टिमको रहेको छ।
गीत सार्वजनिक कार्यक्रममा चलचित्र निर्माण टोलीले पत्रकार भेटघाट कार्यक्रम राखेको थियो। पत्रकार भेटघाट कार्यक्रम गरि गीत सार्वजनिक गर्दै गर्दा डेव्यु निर्देशक तथा अभिनेता सपुत भन्छन :मानिष जुनसुकै जात, धर्म अनि वर्गको भएपनि एक नै भएको सन्देश ‘हेर्दै आँखामा’ गीतले दिनेछ ।प्रकाश सपुतले चलचित्र ‘वसन्त’ नेपाली समाजकै कथा आफूले प्रस्तुत गरेको बताएका छन् । साथै चलचित्रमा कहिल्यै पुरानो नहुने कथा राखिएको उनले दावी गरेका छन् ।
आइतवार सार्वजनिक गीतमा चलचित्रका मुख्य पात्र वसन्तले विभिन्न धर्म र संस्कार अनुसार विवाह गरेको देखाइएको छ । जसले चलचित्रको कथा र त्यसको मर्मलाई चित्रण गर्ने देखाइएको छ ।
सार्वजनिक गीतमा गायक सुगम पोखरेल र गायिका समीक्षा अधिकारीले स्वर दिएका छन् । चलचित्र निर्देशक समेत रहेका अभिनेता सपुतको नै शब्द रचना तथा संगीत अनि योगेश काजी शाहको संगीत संयोजन छ । सुशन प्रजापतिको छायांकन रहेको गीतमा केवीका खत्रीको नृत्य निर्देशन र प्रवीन भट्टको सम्पादन रहेको छ ।
चैत २२ गते शुक्रवारदेखि नेपाल र विदेशमा एक साथ रिलिज हुने चलचित्रमा प्रकास सपुत, स्वस्तिमा खड्का, प्रभात पाल ठकुरी, श्री शिभान्सी, उर्मिला लाम्गादे र खड्क बहादुर पुन (खबपु), अनुप बराल, कमलमणी नेपाल, प्रकाश घिमिरे, विशाल पहारी लगायतका कलाकारहरुको अभिनय रहेको छ ।
चलचित्रमा कथा, पटकथा र संगीत पनि निर्देशक सपुतले नै तयार पारेका हुन् । विपन्न विश्वकर्मा समुदायको छोराको लेखक बन्ने सपना र लक्ष्य हासिल गर्न उसले गर्ने संघर्षको कथा चलचित्रले भन्ने छ ।
फिल्मकी निर्मातामा मोहन विश्वकर्मा र बिन्दु बोहोरा तथा कार्यकारी निर्मातामा अनुरोध भट्टराई, नाना थकाली र विरेन्द्र नारायण श्रेष्ठ छन् ।
गायक तथा निर्देशक सपुतको जन्मथलो बागलुङ, काठमाडौं र तराईका विभिन्न ठाउँमा चलचित्रको छायांकन गरिएको छ । काठमाडौं उपत्यकामा डिसिएन र मोफसलमा एफडी कम्पनिले चलचित्रलाई वितरण गर्नेछन् ।
प्रतिक्रिया