सबस्त इन्टरटेनमेन्ट,काठमान्डौ – निर्देशक सुदीप भूपाल सिंह निर्देशित नयाँ नेपाली चलचित्र ‘श्री बुकुरो : द होम कलिङ’को रोमान्टिक पोस्टर सार्वजनिक गरिएको छ।
आधिकारिक ट्रेलर सार्वजनिक हुनु अघि रिलिज गरिएको पोस्टरमा आशीर्वाद बी क्षेत्री र निकिता आचार्य गहिरो रोमान्टिक मुडमा देखिएका छन्।
पोस्टरले पर्दामा उनीहरूको प्रेमकथा विशेष रूपमा प्रस्तुत हुने संकेत गरेको छ। चलचित्रमार्फत निर्देशक सिंहले करिब सात वर्षपछि निर्देशनमा पुनरागमन गरेका हुन्। यसअघि उनले दर्शकमाझ चर्चित चलचित्र ‘माला’ र ‘रुद्रप्रिया’ निर्देशन गरेका थिए।
चलचित्र रेञ्ज ब्यानरमा निर्माण भएको यो पारिवारिक कथावस्तुमा आधारित चलचित्रमा आशीर्वाद क्षेत्री, लक्ष्मी गिरी, निकिता आचार्य, प्रतीक राज आचार्य, रोशनी कार्की, राजन इशान, दीपिका थापा, लय संग्रौला, मोहन निरौला, रामबाबु रेग्मी, रश्मि भट्ट, उत्तम केसी, गीता थापा, सपना श्रेष्ठ, आशिका शाही, दीपक कार्की र रजिना विश्वकर्मा लगायतका कलाकारहरूको अभिनय रहेको छ।
चलचित्रको कथा तथा पटकथा स्वयं निर्देशक सिंहले लेखेका हुन् भने रुबी सेन सिंह निर्माता हुन्। छायांकन सञ्जय लामा र राजेश श्रेष्ठले गरेका छन्। चलचित्रको छायांकन मुस्ताङ, बागलुङ, कास्की, दमौली, मकवानपुर र काठमाडौं लगायत विभिन्न स्थानमा गरिएको हो।
चलचित्रमा रनजीत गजमेर र बसन्त सापकोटाको संगीत रहेको छ। ट्रेलर आज रिलिज हुँदैछ।
प्रतिक्रिया