चक्कु देख्दा झस्किनछन् सैफ

सबस्त इन्टरटेनमेन्ट,काठमाडौँ । भारतीय अभिनेता सैफ अली खानले सन् २०२५ जनवरीमा आफ्नो घरमा भएको चक्कु आक्रमणको घटनाबाट आफू अझै पूर्ण रूपमा बाहिरिन नसकेको बताएका छन् । हालैको एक अन्तर्वार्तामा सैफले उक्त घटनाले आफूलाई शारीरिक र मानसिक रूपमा गहिरो असर पारेको खुलासा गरेका हुन् । उनले चक्कु देख्दा अहिले पनि आफूमा तत्काल प्रतिक्रिया उत्पन्न हुने बताए ।

आक्रमणपछि आफू लगभग पक्षाघातजस्तै अवस्थामा पुगेको स्मरण गर्दै सैफले रगतको पोखरीमा लडिरहेको बेला आफूले ‘योद्धाजस्तै मर्न’ समेत तयार भएको महसुस गरेको बताए ।

उनका अनुसार घटनापछि परिवारले परिस्थितिलाई अपेक्षाकृत राम्रोसँग सामना गरेको थियो । विशेषगरी उनकी पत्नी करिना कपुर यस घटनाबाट निकै प्रभावित भएको सैफले बताए ।

सैफले आक्रमणका कारण आफू अझै पूर्ण रूपमा सामान्य अवस्थामा फर्किन समय लागिरहेको स्वीकार गरेका छन् । यद्यपि, घटनाका आरोपीप्रति आफूमा कुनै प्रतिशोधको भावना नरहेको संकेत गर्दै उनले उनलाई खुसीसाथ माफ गर्न सक्ने बताएका छन् ।

सन् २०२५ जनवरीमा मुम्बईस्थित आफ्नै घरमा चोरीको प्रयासका क्रममा सैफमाथि पटक-पटक चक्कु प्रहार भएको थियो । गम्भीर घाइते भएपछि उनलाई तत्काल अस्पताल लगिएको थियो । सैफका अनुसार उक्त घटनाको प्रभाव शारीरिक चोट निको भएपछि पनि मानसिक रूपमा भने अझै बाँकी छ ।